PROVINCE OF BOHOL- Nangamatay ang duha ka mga lalaki sa managlahing insidente sa pagkalumos sa Panglao ug Tagbilaran, Bohol, niadtong Dominggo, Hunyo 22, 2025.
Ang mga namatay na-ilahan sa ngalan nga si Aleksei Gribanov, 55, usa ka Russian national nga temporaryong nagpuyo sa Tagbilaran City, ug si Abdul Wallace, 39, ang anak sa tag-iya sa Bohol Bee Farm.
Sa nahimong asoy ni PLTCOL John Kareem Escober
Hepe, Tagbilaran PNP, atol sa ikslusibong pakighinabi sa Bombo Radyo Cebu team kaniya, iyahang gisaysay nga aduna silay report nga nadawat gikan sa Barangay Mansasa, Tagbilaran City nga adunay naglutaw-lutaw nga patayng lawas sa baybayon.
Busa, dali kining gi-respondehan aron masuta ug maklaro ang report nga ilahang nadawat kabahin sa maong insidente, diin, tukma gayud kini, kay pag-abot sa mga sakop sa kapulisan sa maong dapit, naabtan na nila ang patayng lawas sa usa ka Russian national nga si Aleksei Gribano.
Dugang ni Escober, nagsusi usab sila pamaagi sa imbestigasyon sa maong dapit, ug usab nang-interview sa pipila ka mga residente, diin nakig-koordinar usab sila sa Russian Embassy aron itaho ang maong panghitabo.
Tataw usab ni Escober, upat na ka adlaw nga wala makauli si Gribanov sa wala pa makaplagi ang iyang lawas nga anaa na sa sayong bahin sa pagkadugta, busa nihangyo na sila nga ipa-autopsy ang patayng lawas niini aron masuta kon duna bay foul play ang iyang kamatayon.
Samtang sa pikas bahin, nalumos usab si Abdul Wallace samtang nangisda sa kadagatan sa Virgin Island sa Barangay Poblacion,Panglao Bohol sa susamang adlaw.
Basi sa inisyal nga nahagpat sa kapulisa, si Wallace kinsa gitoohang walay saktong gamit, nakaabot sa lawom nga tubig gamit ang pumpboat sa wala pa ang insidente.
Dugang pa, si Wallace nakakuha og dako nga isda ug gitoohang gigukod kini hangtud nga nahutdan kini og hangin basi sa regulator sa iyang relo. | Bombo Irene Ardiente
