Nasagmuyo ang House Prosecution Panel sa gihimo sa kampo ni VP Sara Duterte partikular na sa Answer Ad Cautelam nga gisang-at sa Writ of Summons sa Senate impeachment court.
Matod ni Atty. Antonio Bucoy, ang tigpamaba sa prosekusyon, imbes direktang tubagon ang mga alegasyon nga anaa sa articles of impeachment, gi-divert kini sa kampo sa bise presidente ngadto sa procedural issues.
Basi sa tubag sa bise presidente, gibasura niini ang impeachment complaint tungod sa paglapas sa one year bar rule ug gitawag pa kini og ‘scrape of paper’ o basura.
Gitataw ni Bucoy nga dili kini ang ‘bloodbath’ nga ilang gipaabot.
Wala usab nipaak si Bucoy sa pangangkon sa kampo sa bise presidente nga wa silay tubag kay wala may articles of impeachment.
Gisubli ni Bucoy nga buhi ug maayo pa ang articles of impeachment nga gilakip sa Writ of Summons.
Giklaro usab niya nga dili tubag ang gisang-at sa kampo sa bise presidente kon dili usa ka Ad Cautelam, nga nagpasabot nga ‘is for caution’ tungod kay wala gihapon niya ilha ang hurisdiksyon sa senate impeachment court.
Apan tungod kay gitubag pa sa bise presidente ang tawag, nagtuo sila nga magpadayon gihapon ang pagdungog.
Adunay lima ka adlaw ang kampo sa prosekusyon sa pagtubag sa tubag sa bise presidente nga ad cautelam apan matod nila nga posibleng makasumite sila sa ilang tubag sa sayo pa.
