Giklaro sa Department of Justice nga wala silay gasto sa pagpadala og mga testigo sa International Criminal Court batok ni kanhi Presidente Rodrigo Roa Duterte sa The Hague, Netherlands.
Kini ang giklaro ni Justice Secretary Jesus Crispin Remulla human gipangutana kon aduna bay kuwarta nga ipagawas o gamiton ba ang public fund aron lang ipadala niadtong mosumiter sa ilang testimonya.
Matod niya nga ang ilang gihimo dinhi mao ang pagpakigkomunikar sa International Tribunal kon unsay gusto niini alang sa kaso sa kanhi presidente.
Apan wala kini magpasabot nga motabang sila sa mga testigo hangtod nga moabot sila sa The Hague, Netherlands diin napriso si kanhi Presidente Duterte.
Apan ang inisyatiba lamang sa maong departamento mao ang pagseguro nga anaa sila sa maayong kahimtang ug pagseguro nga mamenosan ang mga hulga sa kinabuhi nga ilang madawat.
Giingong importante kini sama sa pagsiguro sa kaluwasan sa mga mosumiter sa ilang testimonya ngadto sa ICC aron motestigo sa kaso.
Busa, padayon nga nakigkomunikar ang Department of Justice sa International Criminal Court kon unsay i-request niini sa nasud labot sa kaso nga giatubang sa kanhi presidente.
