Mahimong mous-os ang presyo sa produktong petrolyo sunod semana og P1 ngadto sa P2 matag litro human sa kapin sa P5 matag litro nga usbaw sa nakalabay nga semanaha.
Sumala pa ni Department of Energy Oil Industry Management Bureau (DOE-OIMB) Director Rodela Romero sa pagsubay sa upat ka adlaw nga trading sa Mean of Platts Singapore kay gipanglantawan niini ang rollback sa presyo sa produktong lana.
Ang bana-bana kay mao ang P1 ngadto sa P1.40 sa gasoline, P1.60 ngadto sa P2.10 sa diesel o krudo, samtang P2 ngadto sa P2.20 sa kerosene.
Dugang ni Romero nga ang posibilidad sa ceasefire sa panagbangi sa Iran ug Israel kay maoy naka counterbalance sa daong saka sa presyo sa nakalabayng semana nunot sa pag-ataki sa Estados Unidos sa mga Nuclear sites sa Iran.
Ang global crude prices kay misaka sa kapin US$78 kada barrel sa nakalabayng semana tungod gihapon sa kahuyang sa sitwasyon sa Middle East.
Apan karon ang presyo kay mitibugsok na human mi-anunsyo na si US President Donald Trump sa ceasefire niadtong Hunyo 23 nga nakapakalma sa kalibutanon merkado nga sumala sa mga ekonomista usa ka “speculative-basis.”
