Niabot na sa nasud ang 8 pa ka mga Filipino caregivers gikan sa Israel.
Mao kini ang gikompirmar sa Department of Migrant Workers (DMW) nga mitugpa sa Ninoy Aquino International Airport (NAIA) niadtong Miyerkules sa gabii ang mga repatriated Filipinos.
Diin giabiabi sila sa mga opisyal gikan sa Department of Migrant Workers (DMW), Department of Social Welfare and Development (DSWD), Overseas Workers Welfare Administration (OWWA) ug mga medical team gikan sa Manila International Airport Authority.
Gihatagan dayon sila og temporaryong puy-anan, transportasyon ug mga health checkups.
Ingon man nga misaad ang DMW ug OWWA nga mohatag og panginabuhian, trabaho ug tabang sa panglawas sa mga Filipino returnees.
Kini ang ika-38 nga batch sa mga OFW nga na-repatriate gikan sa Israel sukad gisugdan sa gobyerno ang ilang voluntary repatriation program human sa mga pag-atake kaniadtong Oktubre 7, 2023.
Kini ang ikaduhang grupo nga gipapauli sukad ang Iran ug Israel nagbinayloay og mga missile ug air strike niadtong Hunyo 13 ning tuiga sa wala pa ipatuman ang ceasefire niadtong Hunyo 24, nga nagtapos sa gitawag nga “12 days of war” tali sa duha ka nasod.
