Wala nahimong babah ang sunod-sunod nga pag-ulan tungod sa bagyong Bising ug Habagat sa Philippine ug US Army sa pagkompleto sa mga kalihokan sa US-Philippines Salaknib Exercises 2025.
Ang joint army exercises gipahigayon sa Northern Luzon, diin kasagarang nasinati ang pag-ulan tungod sa duha ka weather system.
Matod sa tigpamaba sa Philippine Army nga si Colonel Louie Dema Ala, hapsay nga napahigayon ang mga nakalinya nga aktibidad sa militar sa nasangpit nga simulation, lakip na ang test fire sa pipila ka missile system, ground force movement, ug uban pa.
Siya miingon nga ang duha ka kasundalohan nakahimo sa pagtuon sa nagkalain-laing mga taktika sa militar nga mao ang nag-unang focus sa simulation series samtang nag-ila usab sa mga kal-ang nga kinahanglan nga sulbaron sa sunod nga military exercises.
Sa 2025 nga pag-uli sa Salaknib, ang konsepto sa usa ka bug-os nga pagsulay sa gubat gipaila, dili sama sa miaging mga tuig nga ang mga konsepto sa operasyon lamang ang gipunting sa simulation.
Ang 2025 exercises kabahin sa nasangpit nga military exercises ang kalihukan o deployment sa mga sundalo gikan sa usa ka lugar ngadto sa gitudlo nga battlefields, transportasyon sa mga gamit iggugubat, ug ang ilang paggamit sa mga battefields.
Usa sa mga sentro sa pagbansay mao ang paggamit sa High Mobility Artillery Rocket System (HIMARS), usa ka light multiple rocket launcher nga gigamit sa US Army – Indo-Pacific Command.
Matud pa sa PH Army nga gitun-an niini ang tanang mga hinungdan sa operasyon sa maong rocket system aron magamit usab kini sa kasundalohan kung makahukom ang gobyerno nga mokuha sa maong rocket system.
Ang Salaknib Exercises maoy usa sa joint military exercises ubos sa Balikatan Exercises. Kini tungod sa kooperasyon sa ground forces tali sa US ug Pilipinas.
Ang 2025 nga pag-uli opisyal nga matapos sa Lunes, Hulyo 7.
