PROVINCE OF CEBU- Migahin ang Kagamhanang Lalawigan sa Sugbo og P1.7-milyones nga ayuda para sa mga nabiktima sa sunog sa Sitio Managa 2, Barangay Tabunok sa dakbayan sa Talisay niadtong Hunyo 25, 2025.
Kini agig tubag sa mando ni Cebu Provincial Governor Pamela “Pam” Baricuatro sa pag-aprobar sa pag-release sa maong hinabang-pinansyal sa 248 ka mga pamilya nga apektado sa maogn katalagman.
Sumala pa ni Marirose Lopez, ang Assistant Department Head sa Cebu Provincial Social Welfare and Development Office (PSWDO) nga ang hinabang kay i-apod-apod sa maong mga biktima diin P10,000 ang madawat sa 140 ka mga pamilyang naugdaw sa tibuok ang panimay, P6,000 sa 16 ka pamilyang adunay kadaot lang sa ilang balay, ug P3,000 sa 92 ka mga renters ug sharers nga nawalaan og kapuy-an sa maong dapit.
Sumada sa mga fire investigators sa maong sunog ang danyos sa kabtangan nga muabot sa P2.55-milyones.
Dugang ni Lopez nga ang mga ayudad kay kasamtangang giproseso na og ipang-apod sa mga biktima sa higayon ma-ready na ang budget ngadto sa evacuation area sa Tabunok Gym.
Kahinumduman nga nadtong Hulyo 3, si Talisay City Mayor Gerald Anthony “Samsam” Gullas ang mi-request sa financial support ngadto sa Kapitolyo para sa mga nabiktima sa sunog niyang mga konstituwente.
Gani, mismong si Gov. Baricuatro ang mibisita sa evacuation area sa susamang adlaw diin nahimamat niini ang kalisod nga gisagubang sa mga apektado sa katalagman sa sunog.
