Tangtang na sa katungdanan ang tanang opisyal gikan sa procurement arm nga nalambigit sa pagpalit sa giingong overpriced nga mga laptop, matod sa Department of Budget and Management (DBM).
Nitumaw ang pamahayag sa DBM human sa pagpasaka og kasong kriminal batok kang kanhi Education Secretary Leonor Briones, ug 13 ka uban pa kalabot sa giingong mga anomaliya sa pagpalit og mga laptop nga nagkantidad og P2.4 bilyones alang sa mga magtutudlo sa publikong eskwelahan sa panahon sa kataas sa Covid-19 pandemic.
Lakip sa mga personalidad nga nalambigit sa maong overpriced nga laptop deal mao sila si kanhi Procurement Service-DBM (PS-DBM) officials Lloyd Christopher Lao, Jasonmer Uayan, Ulysses Mora, Marwan Amil, ug Paul Armand Estrada.
Nunot niini, gipasalig ni DBM Secretary Amenah Pangandaman ang hingpit nga kooperasyon sa departamento sa nagpadayong imbestigasyon sa Ombudsman, nunot sa desisyon niini sa pagpasaka og mga kasong graft batok sa kanhi mga opisyal sa PS-DBM.
Kahinomdoman nga kaniadtong 2022, namatikdan sa Commission on Audit (COA) ang pagpalit sa Department of Education (DepEd) og kapin sa 39,000 ka mga laptop sa kantidad nga P58,300 matag usa pinaagi sa Procurement Service – DBM (PS-DBM).|Bombo Irene Ardiente
