Gihangop sa defense team ni Bise Presidente Sara Duterte ang desisyon sa Korte Suprema ang pagdeklarar sa articles of impeachment batok kaniya nga unconstitutional.
Sumala sa opisyal nga pamahayag sa iyang defense team, ang desisyon sa Korte Suprema nagpalig-on sa ilang pagtuo nga ang ikaupat nga impeachment complaint nakalapas sa usa ka tuig nga pagdili nga gilatid sa Article XI, Section 3(5) sa 1987 Constitution.
Ilang gihimug-atan nga ang unanimous decision dili lang kadaugan sa Bise Presidente, kondili pagpalig-on usab sa lagda sa balaod ug pasidaan batok sa sayop nga paggamit sa proseso sa impeachment.
Gipasalig sa grupo nga andam silang motubag sa bisan unsang alegasyon sa saktong panahon ug sa tukmang forum.
Gideklarar ni Atty. Camille Sue Mae Ting, ang tigpamaba sa Korte Suprema diin gipahigayon atol sa Supreme En Banc Session, ang mga artikulo sa impeachment nga ‘unconstitutional’ ug ‘null and void’ pinaagi sa unanimous votes sa mga justices.
Diin 13 ka mga mahistrado nga nibotar pabor niini nga deklarasyon, samtang usa ang ni-abstain niini ug ang usa kay ‘naka-leave’.
Samtang, pipila ka mga senador ang nagpadayag sa ilang kasagmuyo sa desisyon sa Korte Suprema sa pagbasura sa impeachement sama nalang ni Senador Risa Hontiveros pinaagi sa iyang social media page diin dako ang iyang kahiubos gumikan gipugngan sa Korte Suprema ang pagduso sa impeachment trial kang VP Sara.
Kini bisan paman nga tin-aw sa ilang habig nga wala gisalikay nga sad-an ang opisyal ug mamahimo gihapon nga isang-at ang impeachment complaint sunod tuig, apan daghan kini og pangutana kabahin sa short-term and long-term ruling.
Sama nalang kung giunsa paglapas ang “one year bar rule” kung daw gani usa ra ka kaso ang gipasaka sa Senado.
Ingon man si Senador Bam Aquino, diin kusganong gibarugan nga kinahanglang ipadayon ang impeachment trial tungod kay isip co-equal branch, klaro ang mandato sa konstitusyon ug gahom sa Senado, busa angay’ng tahuron ang proseso sa impeachment.
Hinungdan nga nanawagan kini sa mga kaubang senador nga magpahigayon og caucus aron hisgutan kining desisyon sa SC.
