Walay plano ang Kagamhanan sa Probinsiya sa Sugbo nga hunongon ang P20/kilo nga bugas nga programa sa nasudnong kagamhanan alang sa mga kabus.
Sa press briefing, si Cebu Governor Pamela Baricuatro niingon nga iya nang gikontak si Presidente Ferdinand Marcos Jr. aron masiguro ang pagpadayon sa programa, ug matod niya, gipanglangtawan kini ug siguron nga kini tunhay nga mapatuman.
Subay niini, ipahigayon usab sa Kapitolyo ang hingpit nga pagrepaso sa kasamtangang kasabutan tali sa probinsiya ug local government units (LGUs), ilabi na bahin sa pagbahin sa mga subsidyo.
Matod ni Assistant Provincial Administrator Aldwen Empaces, kinahanglang klaro ang “co-share” tali sa probinsiya ug sa LGUs aron dili makaambit ang tibuok probinsiya sa gasto sa programa.
Makigtagbo ang Kapitolyo sa tanang mayor sa buwan sa Agosto aron maplantsa ang mga detalye sa dili pa mosulod sa bisan unsang Memorandum of Agreement (MOA).
Kahinumduman nga ang P20/kilo nga bugas kabahin sa Kadiwa ng Pangulo program, katumanan sa saad sa kampanya ni Pres. Marcos Jr.
Samtang unang gilusad sa Sugbo niadtong Mayo — usa ka semana sa dili pa ang midterm elections.
Ubos sa setup, ang bugas gikan sa National Food Authority (NFA) gibaligya ngadto sa Food Terminal Inc. (FTI), nga nag-apod-apod niini ngadto sa mga LGU. Ang orihinal nga presyo sa bugas nga P26.50 matag kilo gipaus-os og P6.50 pinaagi sa subsidy nga gipaambit sa FTI ug LGUs, mao nga gibaligya kini sa publiko sa tag P20 matag kilo.
