Gikatakdang ipadayon sunod semana, ang natanggong nga konstruksyon sa Pulangbato Bridge, subay sa desisyon ni Cebu City Mayor Nestor Archival Sr., kinsa gihimug-atan nga poibleng mahuman karong buwan sa Disyembre.
Ang Pulangbato Bridge, usa ka reinforced deck girder bridge, nahimutang sa Barangay Pulangbato sa dakbayan sa Sugbo, kini partikular nga nagdugtong sa sitio Candarong ngadto sa Tanay Road.
Kahinumdoman nga gidaot kini pag-ayo sa bagyong Odette kaniadtong Disyembre 2021, hinungdan nga gipaubos kini sa konstruksiyon nga wala usab gihuman.
Gikataho nga, pagkahuman sa pag-inspeksyon sa tulay – nga nag-aghat sa pagdeklara sa state of emergency- gibuksan pag-usab ni Mayor Archival ang diskusyon sa hinanali nga pagkompleto sa maong proyekto.
Nanghinaot usab ang kagamhanan sa dakbayan nga aprobahan sa konseho ang emergency procurement, nga matugot kanila nga makakuha pundo aron madali ang pagpatrabaho niini.
Tungod niini nga mga paglangay, ang motorista napugos sa paggamit sa delikado nga mga routa nga risgo sa kaluwasan sa mga residente, commuters, ug transport operators sa Barangay Pulangbato. | Bombo Nathaniel Sandoval
