Gibarugan ni Pres. Ferdinand Marcos Jr, nga wala magpasabot nga mabasura na ang reklamo batok sa Bise Presidente Sara Duterte tungod sa pag-archive sa Senado sa articles of impeachment.
Subay sa nahimong desisyon sa Senado, gipasiugdahan sa Presidente nga walay labot niini ug gawas na ang gobyerno niini sa nahimong hukom, ug gisubli niini nga dili siya manghilabot sa impeachment case batok kang VP Sara.
Sa pamahayag usab sa Chief Executive, itugyan kini niya sa House of Representatives ug sa Senado.
Gitataw usab sa Presidente nga walay papel ang ehekutibo sa nasangpit nga reklamo, ilabi na kay usa usab siya ka impeachable officer.
Kahindoman nga adunay 19 ka mga senador ang nibotar sa pag-archive sa articles of impeachment samtang upat ang niboto ug usa ang ni-abstain.
Bisan pa sa gisang-at nga motion for reconsideration sa Kamara ngadto sa Korte Suprema, ang Senado wala motingog ug nagpadayon sa pagboto.
Samtang, giklaro usab sa Presidente nga ang Korte Suprema lamang ang nagdesisyon sa mga isyu sa pamaagi ug dili ang merit sa impeachment complaint batok kang VP Sara.
Nunot niini, buot ipasabot sa Presidente nga ang desisyon sa Korte Suprema walay kalabotan sa pagkamatarong o kasaypanan sa mga akusasyon batok sa bise presidente nga anaa sa impeachment complaint, ug niinsister nga walay trial ug ang unod sa impeachment complaint wala gidebatehan.
Sa katapusan, ang punto lamang sa Presidente mao nga dili siya angayan nga mag-apil-apil sa kaso tungod kay ang Kamara, Senado ug Korte Suprema ang bugtong tahas sa proseso sa impeachment sa Bise Presidente.
