Mitaas og dyutay ang mga kaso sa dengue sa nasod niadtong buwan sa Hulyo ning tuiga.
Base sa datus sa Department of Health (DOH), nisaka ngadto sa 15,091 ang kaso sa dengue gikan sa Hulyo 13 hangtod Hulyo 26, duha ka semana nga sunod-sunod nga paglabay sa bagyong Crising, Dante, ug Emong, inubanan sa epekto sa hanging habagat.
Mas taas kini og 7% kon itandi sa natala nga mga kaso gikan Hunyo 29 hangtod Hulyo 12, nga niabot sa 14,131.
Bisan pa niini, alerto ang ahensya sa mga kaso sa dengue sa nasud ug ang mga dengue fastlanes kay nagpabiling aktibo sa mga tambalanan sa DOH.
Padayon usab nga gipahimangnoan sa ahensya ang publiko batok sa maong sakit pinaagi sa paglimpyo sa mga lugar nga posibleng magpundo og tubig nga mahimong dunggoanan sa mga lamok nga nagdala sa dengue.
Tambag usab sa ahensya nga kung makasinati kag hilanat sulod sa duha ka adlaw ug makabatyag ug sintomas sama sa panakit sa kalawasan o kaunoran ug mata, pagkalipong, ug pagsuka, magpakonsulta dayon sa health center o dengue fast lanes.
