Giangkon ni Presidente Ferdinand R. Marcos Jr. nga daghan pang ghost ug palpak nga mga flood control projects sama sa Barangay Piel, Baliuag, Bulacan.
Matod ni Presidente Marcos nga makaluluoy apan daghan pang mga proyekto nga may kalabotan sa pagbaha nga hinanduraw lang, nga matud niya ila na karong tan-awon.
Sukad nga ilang gilusad ang Sumbong sa Pangulo website, nakadawat sila og pagdagsang sa mga reklamo ug matud pa nila nga ilang susihon pag-ayo ang maong mga reklamo.
Kalabot niini, gipasalig sa Presidente nga dili sila mohunong hangtod mabutyag ang mga identidad sa mga nagpaluyo sa multi-bilyon nga anomaliya gamit ang flood control projects.
Ingon man nga iyang pakusgan ug pasakaan og kaso ang mga nalambigit nga kontraktor ug uban pa nga nagpaluyo sa lapad nga anomaliya.
Unang gibabagan sa PBBM ang pagpagawas sa P60-80 bilyones nga pundo ubos sa 2025 budget, nga giingon sa Malacañang nga mga infrastructure project sa DPWH nga gisal-ot sa Kongreso.
Diin ang maong mga proyekto sa imprastraktura wala mahiuyon sa Philippine Development Plan sa administrasyong Marcos Jr.
Sa laing bahin, ang hepe ehekutibo niingon nga adunay usa ka legal team nga motutok sa legal nga aksyon batok sa mga personalidad nga nalambigit sa mga iregularidad nga may kalabotan sa flood control projects.
Gipasalig sa Presidente nga ilang gukdon ug pasakaan og kaso ang mga nagpaluyo sa kaylap nga mga anomaliya nga naglambigit sa pipila ka mga kontraktor, empleyado sa DPWH ug giingong mga proponent.
Ang Presidente nagkanayon nga depende kung ang pagpasaka sa kaso moabot sa yugto nga mahimong nationwide ug niingon nga mao kini ang tahas sa ilang legal team.
Sa pagkakaron, padayon pa ang ilang pagrepaso sa records sa DPWH ug sa tanang dagkong contractors ug gikan didto, ilang madeterminar kon motakdo ba ang report sa gibalita sa Sumbong sa Pangulo website.
