Giangkon sa mga Ukrainian forces nga ang mga tropang Russia misulod sa eastern industrial region sa Dnipropetrovsk Oblast ug misulay sa pagkubkob sa maong lugar.
Matud ni Victor Trehubov sa Dnipro Operational-Strategic Group of Troops nga kini ang unang dako nga pag-atake nga gilunsad sa rehiyon, apan iyang giklaro nga nahunong ang pag-abante sa mga tropang Russia.
Basi sa assessment sa Ukrainian DeepState mapping project, makita nga ang Russia nag-okupar sa duha ka baryo sulod sa rehiyon, nga mao ang Zaporizke ug Novohryhorivka.
Apan, ang Ukrainian armed forces general staff mihimakak niini ug miinsister nga padayon nilang kontrolahon ang Zaporizke ug nagpadayon usab ang aktibong panagsangka sa maong baryo.
Ingon man nga nagsugod ang mga pwersa sa Russia sa pagsulod sa lugar kaniadtong sayong bahin sa Hunyo samtang sila misulay sa pagsulod pa sa teritoryo sa Ukraine gikan sa Rehiyon sa Donetsk.
Sa wala pa ang gubat, ang Dnipropetrovsk adunay populasyon nga kapin sa 3 milyon ug mao ang ikaduha nga pinakadako nga sentro sa bug-at nga industriya sa Ukraine pagkahuman sa Donbas.
Angayan nga hinumdoman nga ang Presidente sa Russia nga si Vladimir Putin gikataho nga andam sa pagtapos sa gubat sa Ukraine kung ang Kyiv mosurender sa mga lugar sa Donetsk nga rehiyon sa Donbas.
