Nisaad ang 26 ka mga nasud nga andam sila sa pagdeploy og mga tropa ngadto sa Ukraine sa higayon nga maabot na ang usa ka ceasefire deal sa Russia.
Mao kini ang tubag sa mga nasod sa Uropa nga nitambong sa “Coalition of the Willing” summit nga gipahigayon sa France.
Matod sa Presidente sa Pransya nga si Emmanuel Macron, magpadala dayon sila og mga pwersa aron mapugngan ang Russia nga masubli ang mga pag-atake nga nagsugod kaniadtong 2022.
Nakigsulti usab siya kang US President Donald Trump, diin ang US giingong andam usab nga magpadala og mga tropa, samtang si Trump, gi-awhag ang European Union nga hunongon ang pagpalit sa krudo gikan sa Russia.
Mahinumduman nga si Trump adunay personal nga panag-istoryahanay uban sa Presidente sa Russia nga si Vladimir Putin ingon man sa Presidente sa Ukraine nga si Volodymyr Zelensky aron ipasiugda ang pagtapos sa gubat tali sa duha ka mga nasud.
