Gikatakdang susihon ni Cebu City Councilor Winston Pepito, ang chairman sa Committee on Transportation sa Cebu City Council, ang rota sa mga Libreng Sakay buses sa Land Transportation Franchising and Regulatory Board (LTFRB), diin sila nangayo og tabang nunot sa mga reklamo nga ilang nadawat.
Kini human nasuta nga ang mga drayber nga gibayran na sa ilang mga operators, wala na mokuha og mga pasahero tungod kay wala na silay insentibo para mamasahero.
Matud ni Pepito, nga nagpadayon ang mga reklamo sa mga pasahero nga naglisod sa pagsakay og mga bus subay sa rota sa Libreng Sakay program.
Sigon usab sa konsehal nga taud-taud na nga nagsugod sila sa pagdawat ug pag-verify sa mga taho nga ang mga drayber nga nag-operate ubos sa Libreng Sakay scheme giingong nagdumili sa pagkuha og dugang mga pasahero tungod kay gibayran na sila sa ilang tagsa-tagsa ka operator ug dili na makakuha og insentibo.
Dugang usab ni Pepito, nga sagad sa mga driver, mohimo lang og usa ka round trip ug mopili sa oras sa pagbiyahe, ug sagad usab niini maglikay sa peak hours. kini gumikan kay wala na sila maggukod sa gidaghanon sa mga pasahero ug nabayran na usab sila sa gobyerno.
Personal nilang gisuwayan kauban ang Cebu City Transportation Office (CCTO) nga naglatas sa kadalanan, nakighinabi sa mga stranded nga pasahero, ug nakasaksi pa sa pipila ka mga drayber nga nag-standby lang sa usa ka canteen imbes nga magmaneho sa ilang mga rota.
Nakahukom sila nga mohimo og inspeksyon sa mga istasyon sa rota sa “01K” buses, kauban ang LTFRB ug sa CCTO.
Kung masakpan ang mga drayber sa akto nga nagdumili sa pagbuhat sa ilang trabaho, matud sa konsehal itugyan niya ang desisyon sa sanctioning body sa LTFRB, ug nanawagan usab siya nga silotan ang mga mapakyas sa pagsunod.
