Motuman si Senador Chiz Escudero sa bisan unsang mando nga ihatag kaniya aron pagmatuod nga wala siyay nalapas nga balaod.
Subay kini sa giingong pagpasabot nga gipangayo sa Commission on Elections (Comelec) gikan ni Escudero ug lakip ang kontraktor nga nihatag kaniya og P30 milyones nga kontribusyon sa kampanya.
Sa pakighinabi, si Comelec Chairman George Erwin Garcia niingon nga karong adlawa moluwat sila og show cause order batok kang Lawrence Lubiano, tag-iya sa Centerways Construction and Development Corporation, aron ipasabot kung nihatag ba gyud siya og P30 milyones sa kampanya ni Escudero, human kini nga niangkon kaniadto sa Kamara nga nihatag siya og minilyon ka pesos kang Escudero.
Sa higayon nga mosumiter na siya sa iyang tubag, ang senador maoy sunod usab nga mopasabot.
Mapasalamaton hinuon si Escudero kang Comelec Chairman Garcia nga gihatagan siya og kahigayonan nga makapamatuod nga wala siya’y nalapas nga balaod kabahin sa maong hisgutanan.
