CEBU CITY- Gikumpirmar ni Cebu City Mayor Nestor Archival ang pagkahugno sa riprap flood control structure sa National Housing Authority (NHA) relocation site sa Barangay Budlaan.
Niinspeksyon si Mayor Archival uban ni City Administrator Albert Tan ug mga representante gikan sa Department of Engineering and Public Works (DEPW) sa lugar niadtong buntag sa Huwebes, Septiyembre 11, 2025.
Naobserbahan sa mayor nga bato ra ang gigamit nga pundasyon sa riprap. Tungod sa kusog nga agos sa tubig, nangaguba ang pundasyon ug nahugno ang mga bahin sa bungbong.
Matod ni Mayor Archival, ang flood control project gisugdan sa Department of Public Works and Highways (DPWH) pa niadtong 2019, apan hangtod sa inspeksyon wala pa niya kini makita.
Iyang gimanduan ang DEPW nga mag-submit og report aron mailhan kung kinsa ang kontraktor nga responsable sa proyekto.
Nipadayag usab siya og kabalaka nga kung magpadayon ang pagkunhod sa riprap ngadto sa sapa, posible kini magdala og peligro sa mga residente sa duol.
