Kusganong gipamahayag ni Cebu City Councilor Pastor “Jun” Alcover nga “illegal” ang kasamtangang edisyon sa Colon Night Market nga giablihan niadtong Biyernes, Septiyembre 12, 2025.
Kini ang gipamahayag ni Alcover atol sa eksklusibong pakighinabi sa Bombo Radyo Cebu Newsteam diin ang padayong pag-operate sa tanyag nga Night Market sa dalan Colon kay illegal kay wala kini miagi sa Konseho sa Kagamhanang Dakbayan ug sa pag-convene sa Garbo Asenso Sumbanan Alyansa sa Gugma kun GASA Board.
Gani saysay ni Alcover nga daw adunay sindikato ang nagpadagan niini hinungdan nga nagpatawag kini siya og Executive Session sa Konseho sa umaabot Martes, Septiyembre 16.
Dugang pa ni Alcover nga aduna siyay kasayurang nakuha gikan sa Office of the Muslim Affairs and Indigenous Cultural Community (OMAICC) nga pinirmahan sa usa ka “Jenalyn Cortes” ug lain pang mga indibidwal ang nagtugot sa pagpadagan sa mga paninda sa Night Market diin usa kini sa iyang ipatawag sa umaabot nga Executive Session.
Ipatawag pud niini niya nag buhatan sa Cebu City Transportation Office, Traffic Management Board ug uban pang hingtungdan nga departamento aron masusi kini.
