Nangayo sa kooperasyon sa publiko ang Kagamhanang Dakbayan sa Sugbo aron sa pagsuta sa kahimtang sa mga proyektong pang-imprastruktura sulod sa syudad.
Gipahibalo kini mismo ni Cebu City Mayor Nestor Archival Sr. pinaagi sa social media post niini niadtong Dominggo, Septiyembre 14, 2025.
Kini aron sa pag-abag sa ilang kasamtangang pag-verify ug pag-evaluate sa mga kahimtang sa mga proyekto sa Department of Public Works and Highways (DPWH) nga pinundohan sa nasudong gobyerno ug sa Cebu City Department of Engineering and Public Works (DEPW) base sa ilang mga opisyal nga mga rekord.
Gani gidani niini ang mga Sugbuanon nga mag-send og report ug mga klarong mga hulagway sa mga palpak nga proyekto sa mga gubaon nga mga kadalanan, guba nga mga drainage, pagbaha o nanga-ungot nga tubig, bag-ong kinabkaban, ug ang mga dugay nang mga proyektong walay human-human.
Sumala pa nga magamit kini nila nga mga impormasyon gikan sa publiko aron maaksyonan kini lakip na ang pagpatawag sa mga kontraktor sa pagpahuman sa proyekto sa gitakdang panahon.
Giawhag niini nga ang mga report nga adunay mga hulagway kay ipadangat sa official account ni Mayor Archival o sa Cebu City Public Information Office lakip na ang mga kasayuran sa insaktong dapit sama sa pagbutang og pangan sa dalan ug landmark ug uban pang makatabang sa maong aksyon.
