PROVINCE OF CEBU- Mibisita si Cebu Vice Governor Glenn Anthony Soco kang Gobernador Pamela Baricuatro alang sa usa ka pormal nga courtesy call samtang nag-andam siya sa pagpangulo sa opisyal nga delegasyon sa Sugbo padulong sa Nanning City, China, alang sa 22nd China-ASEAN Expo ug 2025 Guangxi International Sister Cities events.
Kauban ni Soco sa maong misyon si Provincial Board Member Malcolm Sanchez gikan sa lone district sa Mandaue ug si Provincial Board Member Dason Lorenz Lagon sa ikatulong distrito sa Sugbo sila ang mga chair ug vice chair sa Committee on Foreign and Local Relations sa Provincial Board.
Importante kaayo ang Nanning, ang kaulohan sa Guangxi Zhuang Autonomous Region, kay kini usa sa mga igsoon nga probinsya sa Sugbo dinhi sa China, kauban pa ang Guangdong, Sichuan, ug Hainan!
Si Soco gikatakdang maghatag ug keynote speech sa Guangxi International Sister Cities Promotion Conference aron ipasiugda ang mas lig-on nga koneksyon sa ASEAN pinaagi sa promosyon sa turismo, pagdani ug dugang pamuhunan, ug pag-establisar sa direktang mga biyahe.
Gipadayag ni Gobernador Baricuatro ang iyang dakong suporta ug maayong pangandoy alang sa delegasyon, ug gidasig silang ipakita ang garbo ug kahawod sa mga Sugbuanon sa internasyonal nga entablado.
Kini nga kalihokan usa ka dakong oportunidad alang sa Sugbo sa pagpakita sa kusog ug pagkahiusa sa global nga panaghigalaay.
