CENTRAL VISAYAS- Giaprobahan na sa Regional Tripartite Wages and Productivity Board (RTWPB) – Region 7 (Central Visayas) ang usbaw sa suholan alang sa mga minimum wage earners ug mga binuwan nga trabahante sa rehiyon.
Base sa Wage Order No. ROVII-26, ang inadlaw nga suholan alang sa mga nagtrabaho sa Class A nga mga lungsod ug siyudad sa rehiyon mosaka gikan sa P501 ngadto sa P540.
Ang mga lugar nga gilakip sa Class A mao ang mga dakbayan sa Carcar, Cebu, Danao, Lapu-Lapu, Naga, Talisay, ug ang mga lungsod sa Compostela, Consolacion, Cordova, Liloan, Minglanilla, ug San Fernando, nga naila usab nga kabahin sa Expanded Metro Cebu.
Samtang, ang mga trabahante sa Class B areas makadawat og inadlaw nga suholan nga P500, gikan sa kanhing P463.
Ang Class B naglakip sa mga siyudad sa Bais, Bayawan, Bogo, Canlaon, Dumaguete, Guihulngan, Tagbilaran, Tanjay, ug Toledo, uban sa mga lungsod nga wala malista sa Class A.
Gitaasan usab ang suholan sa mga household workers, nga karon P7,000 matag buwan sa mga chartered cities ug first-class municipalities.
Ang maong wage adjustments sa rehiyon mahimong epektibo sa Oktubre 4, 2025.
