BOGO CITY,CEBU- Gisugdan na sa Bogo City, Cebu ang pagmontar sa tent city alang sa mga pamilya nga nawad-an og balay tungod sa kusog nga magnitude 6.9 nga linog.
Gihatod sa DSWD ang mga modular tents nga magsilbing temporaryong pinuy-anan sa mga biktima samtang padayon nga gibantayan ang mga aftershocks sa lugar.
Makita ang mga residente ug mga boluntaryo nga nagtinabangay sa pagpahimutang sa mga tolda aron masiguro nga walay pamilya nga mabiyaan.
Subay kini sa direktiba ni Presidente Marcos ug sa pasalig ni DSWD Secretary Rex Gatchalian nga tanan adunay luwas nga kapuy-an panahon sa kalamidad.
Sayo karong alas 2 sa kaadlawon, ang mga pulis sa Cebu Provincial Police Office nitabang sa Department of Public Works and Highways sa pagtukod og 30 ka temporary tent shelters.
