CENTRAL VISAYAS- Miisyu ang buhatan sa Department of Labor and Employment – Central Visayas (DOLE-VII) og “work stoppage” order batok sa mga Business Processing Outsourcing (BPO) company sa Sugbo tungod kay nasutang nakalapas kini sa safety and health protocols.
Kini human adunay reklamong miabot sa DOLE-VII diin pipila ka mga kumpanya sa call center ang pugsanong gipadayon sa pagtrabaho ang ilang mga ahente bisan paman sa linog nga mitay-og sa Sugbo naidtong Septiyembre 30 sa gabii.
Gani aduna nay kumpanya ang gimanduan og “cease and desist” sa ilang operasyon hangtod sa masutang luwas na ang kondisyon sa ilang mga opisina ug wala na sa risgo ang mga ahente.
Sumala sa DOLE-VII nga ang maong mga kalapasan kay naglakip sa kakuwang og Emergency and Disaster Plan, dili kumpletong safety committees, og kapakyas sa Contruction Safety and Health Program.
Gipahimangnoan ni DOLE-VII Regional Director Atty. Roy Buenafe ang mga empleyors ug building administrators nga kini kay pasiuna pa lamang og sa sunod puhon kay mas striktong inspeksyon na ang ilang pagabuhaton.
