PROVINCE OF CEBU- Nagpadayon karon ang pagpulong ug final assessment sa Office of Civil Defense (OCD) Region 7 kabahin sa linog nga miigo sa amihanang bahin sa Sugbo niadtong Setyembre 30.
Kini ang gipadayag ni Dir. Joel Erastain, Regional Director sa OCD-7, atol sa pakighinabi sa Bombo Radyo Cebu News Team.
Matod pa niya, bisan pa man sa kasamtangang kalisod gumikan sa mga nagpadayong aftershocks, padayon gihapon ang ilang operasyon aron masuta ang tinuod nga kahimtang sa mga apektadong lugar.
Dugang pa ni Erastain, aduna na’y mga personnel nga gikan sa National Agencies sa ground nga gipakatap sa ilang mga operational jurisdiction aron mas masabtan ang sitwasyon ug matubag dayon ang mga panginahanglan sa mga residente.
Kung diin, usa sa ilang mga gipang-una karon mao ang pagpahimutang og temporaryong kapuy-an alang sa mga nawad-an og panimalay samtang naghinay-hinay pa og bangon ang komunidad.
Gipasabot usab sa opisyal nga padayon ang pag-update sa death toll ug sa ihap sa mga kadaot nga istruktura sa mga apektadong lugar.
Nipasalig si Dir. Erastain nga walay angay ikabalaka ang katawhang Sugbuanon kay nagkahiusa ang tibuok pwersa sa gobyerno aron masiguro ang seguridad, kahupayan, ug padayon nga paghatag sa hinabang ngadto sa mga biktima sa linog.
