MANDAUE CITY,CEBU- Nagpahigayon og Community Outreach Program ang Mandaue City Police Office (MCPO) Advisory Group niadtong Oktubre 25, 2025, sa Medellin, Cebu, aron matabangan ang mga residente nga grabe nga naapektuhan sa linog niadtong Septyembre 30, 2025.
Gipangulohan ang kalihokan ni Mr. Steven Yu, Chairman sa MCPO Advisory Group, uban sa mga sakop sa grupo ug mga personahe sa CPSMU ubos sa pagpangulo ni PCOL Cirilo B. Acosta Jr., City Director.
Sa eksklusibong pakighinabi sa Bombo News Team Cebu, gipasabot ni Mr. Yu nga ang MCPO Advisory Group gimugna ubos sa Performance Governance System (PGS), aron mapalig-on ang partisipasyon sa komunidad sa mga programa ug inisyatiba sa kapulisan.
Matod pa ni Yu, ang ilang outreach program dili lang tumong sa paghatag og relief goods, kondili paghatag usab og paglaum, kadasig, ug kalipay sa mga pamilya nga naapektuhan sa katalagman.
Gitino niini, nga ang MCPO Advisory Group magpadayun sa mga humanitarian ug community service efforts nga naglatid sa tinuod nga diwa sa serbisyong publiko.
Gidugang pa ni Yu nga daghan pa silang gikatakdang mga programa alang sa komunidad, ilabi na sa Dakbayan sa Mandaue.
Gihatagan og gibug-aton niini, nga ang kalinaw ug kahusay maoy yawi sa kalamboan sa usa ka siyudad.
Sa maong kalihokan, 200 ka mga benepisyaryo ang nakadawat og relief goods nga naglakip sa pagkaon ug mga suplay sa adlaw-adlaw.
Sumala sa grupo, kini nga kalihokan simbolo sa ilang padayon nga pag-alagad sa katawhan, usa ka konkretong ehemplo sa pagtambayayong tali sa kapulisan ug komunidad.
