Nagkaabot pag-usab sila si US President Donald Trump ug Chinese President Xi Jinping alang sa bilateral talks sa South Korea niadtong Huwebes, Oktubre 30.
Kini nunot sa pipila ka buwan sa nagkagrabe nga tensyon sa pamatigayon tali sa duha ka nasud.
Sa usa ka talagsaon nga higayon, ang mga lider sa duha ka pinakadako nga ekonomiya sa kalibutan naglamano sulod sa kapin sa usa ka minuto sa wala pa ang ilang pribadong mga panagsulti nga milungtad og duha ka oras.
Gidayeg ni Trump ang iyang panagkita kang Xi isip usa ka dakong kalampusan.
Samtang, gipahibalo usab ni Trump ang pagpahamtang sa mas ubos nga mga taripa sa mga import sa China ug miingon nga ang China maghatag sa Amerika og mas maayong access sa gitawag nga “rare earths”, mga mineral nga gigamit sa paghimo og mga electric car, computer hard drive, TV screen, jet engine, uban pang electronics ug mga armas militar.
Gipahibalo usab ni Trump nga ang Estados Unidos ug China mopirma og usa ka trade deal sa labing dali nga panahon.//
Kini ang unang face-to-tace meeting tali ni Trump ug Xi sukad niadtong 2019, sa dihang katapusang nagkita sila sa G20 summit sa Osaka, Japan. | via Bombo Ken Apor
