6 missing samtang 1 ang nakuhang patay sa Barangay Bacayan, dakbayan sa Sugbo – Mayor Archival

Gikumpirmar ni Cebu City Mayor Nestor Archival nga unom ka tawo gikan sa Barangay Bacayan ang gitaho nga nawala tungod sa Bagyong ‘Tino.’

Matud ni Mayor Archival nga kini ra ang report nga ilang nadawat ug hangtud karon kay padayon gihapon ang pagsusi sa maong dapit gumikan sa pagsaka sa tubig baha subay sa pagkuso-kuso sa Bagyong Tino.

Ingon man nga nagpadayon ang mga operasyon sa pagpangita ug pagluwas sa lugar.

Sumala usab sa mayor, anaa sa 99 porsyento sa mga sakyanan sa barangay ang nalunod o grabeng nadaot sa baha.

Nasayran nga ang unom ka nawala nga mga indibidwal kay miyembro sa usa ka pamilya, ug ang amahan ra ang gitaho nga nakaluwas.

Nakaplagan usab sa mga awtoridad ang usa ka patayng lawas gikan sa naasoy nga lugar.