Nanawagan ang Catholic Bishops’ Conference of the Philippines (CBCP) sa mga Pilipino nga ipadayon ang ilang mga pag-ampo, donasyon, ug boluntaryong tabang alang sa mga komunidad nga naapektuhan sa bag-ohay nga mga linog ug bagyong Tino.
Sumala sa CBCP, liboan ka mga pamilya ang nawad-an og pinuy-anan ug daghang mga lugar ang nanginahanglan dayon og suporta. Gipasiugda sa simbahan ang kamahinungdanon sa panaghiusa ug kaluoy samtang nagpadayon ang mga operasyon sa pagtabang.
Sa laing bahin, ang nasudnong network niini nakig-alayon usab sa mga diocesan social action center, mga grupo sa civil society, ug mga lokal nga boluntaryo aron maghatud og tabang sa mga apektadong komunidad.
Giawhag usab sa CBCP ang mga parokya ug mga donor nga ipadayon ang ilang suporta samtang nagkadako ang panginahanglan alang sa tabang ug sayo nga pagbangon.
Kahinumduman nga sa miaging mga semana, kusog nga linog ang miigo sa Cebu, Davao Oriental, La Union, Surigao del Sur, ug Zambales. Dugang pa, ang Cebu naigo pag-usab niadtong Nobyembre 4 sa usa ka Bagyo, nga hinungdan sa grabe nga pagbaha.
Miigo usab ang bagyo sa pipila ka mga probinsya sa Visayas, nga hinungdan sa kapin sa usa ka gatos nga kamatayon ug pagbakwit sa liboan ka mga residente.
