Gisugdan na og susi sa Independent Commission for Infrastructure ang mga flood control project sa Sugbo.
Gipangulohan ni Baguio City Mayor Benjie Magalong ang inspeksyon sa mga taytayan nga naguba sa lalawigan sa Sugbo nunot sa pag-igo ni Bagyong Tino kauban ang mga district engineering ug mga sakop sa kapulisan.
Unang gisusi sa ICI ang Butuanon River sa dakbayan sa Mandaue nga nakahiagom og dakong kadaot human nga miawas ang tubig baha ug gibanlas ang pipila ka mga kabalayan nga anaa duol sa sapa.
Nasayran usab nga miabot sa 12 ka metro ug nakatala usab ang dakbayan og 14 ka patay.
Gawas sa Butuanon River, gibisita usab niini ang Liloan nga usa sa mga grabeng gikuso-kuso sa katalagman.
Ingon man ang dakbayan sa Sugbo ug Talisay City nga wala makalikay sa tubig baha nga mikalas usab og kinabuhi.
