Nilabay na ang dul-an 3 ka semana human nga gikuso-kuso ni Bagyong Tino ang Sugbo, kasamtangang nagpadayon pa gihapon ang search and retrieval operation sa sakop sa Cebu City Disaster Risk Reduction and Management Office.
Kini basi sa mga gikabutyag sa mga isig ka pamilya nga nagpabiling missing ang sakop niini hangtud karon, gani kasagaran niini mga bata, senior citizen, ug kababay-an.
Atol sa ekslusibong pakighinabi sa Bombo Radyo Cebu team kang Dave Tumulak ang Committee Chairman sa CCDRRMO, iyang gipaambit nga aduna silay nagkalain-laing grupo nga adunay tagsa-tagsa ka mga rota matag adlaw.
Dugang ni Tumulak aduna gihapoy 6 kabuok ang nagpabiling missing sukad pa sa pag-igo sa bagyo, nga gagikan sa Barangay Paril, Lusaran, ug Bacayan.
Gipaambit usab niya nga nanghangyo na siya sa mga nagkadaiyang search and retrieval teams nga dugtungan ug lugwayan ang sakripisyo ilabi na nga dili lalim ang nahiagoman sa matag pamilya niining nagpabilin.
Busa, nisugot ra usab sa maong hangyo ang search and retrieval teams, ug padayong naningkamot nga makit-an ang mga nagpabiling missing.
