Nakasinati og taas nga lebel sa tubig-baha ang pipila ka mga residente sa Carcar, Cebu, partikular na usab sa Brgy. Poblacion 3 tungod sa gipahinabi ni Tropical Depression Verbena karong adlawa, Nobyembre 25.
Nangunay pagbisita ang Bombo Radyo Cebu team sa maong dapit, aron personal nga masuta ang kasamtangang sitwasyon sa maong dapit.
Gani, naabtan pa nga ang mga residente nga nag-iyahay og banwas sa mga lapok nga dala sa baha nga nasulod sa ilahang isig ka panimalay.
Sumala pa sa pipila ka residente, nakasinati na sila og pagbaha sauna, apan mas grabi ang ilahang nasinati karon kay nanulod naman sa ilahang panimalay ang tubig-baha tungod sa uwan nga nabobo sa Tropical Depression Verbena.
Sa ekslusibong pakighinabi sa Bombo Radyo Cebu team kang Edwin Gabutero nga niabot gayud sa taga-dughan ang lebel sa tubig-baha nga ilahang nasinati.
Gitataw niini nga bisan nga pirme na sila makasinati og pagbaha kung adunay bagyo, apan karon rang panahona nga ingun ini kataas ang lebel sa tubig.
