Dili makatuo ang mga tang-an sa Cebu Normal University nga makasulod sa topnotchers sa November 2025 Nurses Licensure Examination kini taliwa sa hulga sa bagyong Tino nga miigo sa Sugbo.
Sa pakighinabi sa Bombo Newsteam sa mga garbo sa CNU nadayeg nila ang makakagahom sa tanan tungod wala sila magdahom nga makasulod sa top kini taliwa sa pagduha-duha, hilabi na nga daw inihap nila ang mga sigurado nga tubag.
Apan, bisan paman sa dili makatuo nga resulta hinay-hinay nila kini nga gihangop ug dili masukod ang ilang kalipay nga nabayran tanang kahago ug ang ilang pagpaningkamot.
Gipaambit usab ni Kristina Ysabel Degula, top 5, ang iyang usa sa mga sekreto aron makab-ot ang maong kalampusan diin matud niini nga kinahanglang ‘consistent’ lang sa tanang buhaton aron makab-ot ang pangandoy bisan paman adunay pagduha-duha apan dili kini rason nga modili ug mo-give up.
Alang usab ni Degula nga ang gamay nga effort dako nasab og tabang nga bisan asa ka paingon anaa kay padulngan.
Wala usab nakapugong ang hulga ni bagyong Tino sa pangandoy ni Helena Ruth Lapurga, ang top 6 nga bisan nawad-an og kuryente, nasudlan og tubig baha ang ilang balay, ingon man ang haguros sa hangin apan usa ang iyang ngalan nga mitigbabaw sa NLE.
Ingon man nga dako usab ang ilang pasalamat sa PRC sa paglugway sa exam isip konsiderasyon sa mga takers nga grabeng gilunupan ug naapektuhan sa mga kalamidad.
Giisip usab ni Byron Chu, top 8 ang pakigbisog sa adlaw-adlaw kay alang kaniya ang tanang kahago ug kakapoy adunay padulngan kung duyugan ang pagtuon og ‘consistency’ ug dili lang motibasyon.
Gikombinsar usab niini ang iyang kaugalingon nga moabot ang saktong panahon nga ‘worth it’ ang tanan, ingon man usa sa iyang gibuhat nga pag-manifest ang pag-acting nga usa siya sa mga nag-top na ug epektibo kini kay nahimo man kini nga top 8.
Dili usab makatuo ang usa sa mga nag-top 10 nga si Mariella Eliza Mascariñas, kini taliwa sa sigurado siya sa mga sayop nga tubag, apan nanghinaot gihapon siya nga makita ang iyang ngalan sa mga nanguna ug wala niya damha nga ihatag gayud sa Ginoo, hinungdan nga dako ang iyang pasalamat.
