Wala maagii ang kadalanan sa Toledo Wharf Road, Sitio Telepono sa Barangay Manipis, Talisay City kaganihang buntag karong adlaw sa Biyernes, Disyembre 12 tungod sa landslide nga nahitabo sa maong dapit.
Atol sa eksklusibong pakighinabi sa Bombo Radyo Cebu News Team kang Jonathan “Joy” Tumulak, ang pangu sa City of Talisay – Traffic Operations and Development Authority (CT-TODA) diin gidetalye niini nga tibuok dupa sa maong kadalanan ang natipun-ogan sa midahiling yuta hinungdan nga wala kini maagi.
Gani daling milusad ang CT-TODA inabagan sa mga opisyal sa barangay ang pagpahigayon og clearing operation gamit ang mga heavy equipment sa maong dapit tungod kay walay laing diversion road nga mamahimong alternatibo unta para sa mga motorista mubaybay sa maong routa nga gipahibalo niini sa Naga-Uling Road nalang mangagi.
Maayo nalang og walay nataho nga naigo, natabunan o naangol sa mismong insidente sa pagdahili sa yuta diin aduna pay video nga mikatap online sa mismong takna sa panghitabo.
Ingon man nga padayong pahimangno sa mga awtoridad sa mga motorista ug residente sa maong dapit nga magpabiling alerto tungod taas permi ang risgo sa landslide sa maong lugar ilabi kung gikan sa pag-uwan sa mga nakalabayng adlaw o semana.
