Natabunan sa landslide ang usa sa mga nag-unang agianan paingon sa tuktok sa Mount Fuji human sa kusog nga pag-ulan sa central Japan.
Natabunan sa mga debris ang tulo ka mga sakyanan, apan walay gitaho nga mga naangol o namatay.
Sumala sa Japan Meteorological Agency, nakasinati og kusog nga pag-ulan ang kabukiran sa Shizuoka Prefecture gikan sa gabii sa Martes hangtod sa buntag sa Miyerkules.
Tungod niini, gisirad-an ang Fuji Subaru Line—usa sa mga nag-unang rota paingon sa Mount Fuji.
Samtang, duha ka mga climber ang nakit-an nga walay panimuot sa managlahing agianan sa Mount Fuji.
Hinuon, wala pa gikonektar sa mga awtoridad ang mga insidente ngadto sa landslide, ug gipadala na ang usa ka police mountain rescue team sa naasoy nga lugar.
Samtang, sa Kawanehon, Shizuoka, usa ka trabahante ang namatay human naigo sa laing landslide.
Dakong epekto usab ang gidala sa kusog nga pag-ulan sa Aichi ug Gifu, diin 41 ka tawo ang gitaho nga naangol tungod sa baha.
Sa Nagoya, ang gidaghanon sa ulan miabot sa rekord nga 104.5 millimeters sulod lang sa usa ka oras.
Gilauman nga magpadayon ang kusog nga pag-ulan sa pipila ka bahin sa Japan hangtod sa hapon sa Miyerkules.
