Samdan ang tulo ka mananayaw sa Sinulog, lakip na ang usa ka menor de edad atol sa nahitabong rambol samtang nagpraktis sa Sinulog niadtong Domingo, Enero 4, 2026, sa Barangay Luz, Dakbayan sa Sugbo.
Sumala sa imbestigasyon sa Mabolo Police Station, samtang ang mga mananayaw nagpraktis alang sa Sinulog street dance pasado alas 2:00 sa kaadlawon niadtong Domingo, matud pa kalit nga miabot ang usa ka grupo sa mga batan-on ug giatake sila.
Gikataho nga gibunalan ug gikulata sa mga tig-atake ang mga mananayaw, nga miresulta sa pagkaangol sa tulo ka biktima, samntang usa sa mga instruktor sa mga biktima ang mitawag dayon sa mga barangay tanod, kinsa dali nga midakop sa mga suspek.
Usa sa mga suspek ang giingong nagdala og hait nga hinagiban, nga hinungdan sa mga samad sa ulo ug nawong sa mga biktima.
Emosiyonal usab nga nangayo ug pasaylo si “Alias Chan” sa nahitabo gumikan kay nadala ra sila sa emosiyon og wala tuyoa ang maong panghitabo.
Gidala sa tambalanan ang mga biktima nga sila si Jounelyn Alforque Margallo, 21-anyos; James Ryan Nethan Rabanes Pipeto, 21-anyos; ug laing 17 anyos nga lalaki, pulos taga Barangay Luz, Dakbayan sa Sugbo.
Daling nasikop usab sa mga mirespondeng barangay tanod Ang lima ka suspek, upat kanila mga menor de edad nga giilang sila si; Cid Marl Aboyme, 21-anyos ug laing 4 ka menor de edad nga residente usab sa Barangay Luz.
Gawas sa mga samad nga naangkon sa mga mananayaw, ang pipila ka mga props sulod sa practice area sa Barangay Luz, nangaguba usab atol sa away.
Kasamtangan karon nga nagpadayon ang imbestigasyon, samtang anaa karon sa kustodiya sa Mabolo Police Station ang lima ka mga suspek.
