Gitaho sa buhatan sa Cebu City Department of Public Services (DPS) nga ang ilang nahakot ug nakolektang basura sa dakbayan kay nahatud na sa nasabutang dumpsite sa Barangay Polog sa lungsod sa Consolacion.
Kini ang gipahibalo ni John Paul Gelasque ang pangu sa Cebu City DPS sa eksklusibong pakighinabi niini sa Bombo Radyo Cebu News Team diin sumala pa nga sugod niadtong Enero 12 kay nakahatud na sila sa mga nakolektang basura sa pasildad sa Asian Energy isip temporary dumpsite sa dakbayan sulod sa 30-ka adlaw subay sa nasabutang niini sa Department of Environment and Natural Resources – Environmental Management Bureau (DENR-EMB), lokal nga panggamhanan sa Barangay Polog, ug lungsod sa Consolacion.
Giklaro sa opisyal nga ang ilang pagtambak sa basura ngadto sa Polog, Consolacion kay sa temporaryong kapasidad lamang tungod kay mao kini ang pinakaduol sa dakbayan nga girekomendar sab sa DENR-EMB sa dili pa ang pagpangita og permanenteng solusyon nsa suliran sa waste management sa syudad.
Mitaho sab ang opisyal nga ang ilang inisyal nga bana-bana sa 600-700 ka tonelada sa basura na ang nahatod sa dakbayan. Gitumbok pud niini nga ila nang gimanduan na nila ang mga barangay garbage personnel sa pagsiguro nga walay basura nga magtagak-tagak sa byahe aron dili kini makatampo sa kahugaw sa mga gipanglatasan nga mga lugar padulong sa bukirang bahin sa lungsod sa Consolacion.
