CEBU CITY- Gibutyag ni Fritz Valiente, usa sa mga survivor sa nahitabong pagdahili sa landfill sa Barangay Binaliw 1, nga wala gihapon siya mawagtangi og paglaom taliwala sa grabeng kasinatian nga iyang naagian human siya natabunan sa mga basura.
Matod ni Valiente, grabe ang kalisod ug kahadlok nga iyang nasinati sa dihang nahitabo ang insidente, apan nagpabilin siyang malig-on ug nagkupot sa paglaom alang sa iyang pamilya.
Gisaysay sa biktima nga siya nagtrabaho isip kabahin sa finance department sa kompanya, nga nahimutang sa ikaduhang andana (2nd floor) sa maong opisina dihang nahitabo ang insidente.
Sumala kaniya, samtang nagtrabaho siya, kalit lang siyang nakadungog og kusog nga dahunog gikan sa ibabaw nga bahin sa building. Tungod niini, dali siyang nakamatikod sa posibleng peligro ug mitago sa ilawom sa lamesa.
Nasayran na lang ni Valiente nga napiit na ang iyang tiil sa mga debris nga nangatagak gikan sa ibabaw nga bahin sa landfill. Aron makapangayo og tabang, misulay siya og pakigtawag sa iyang mga kauban pinaagi sa pagdukdok og mga butang aron makahimo og kasaba.
Gihimug-atan sa survivor nga adunay kakulangan o pagpabaya sa operasyon sa landfill nga mitultol sa insidente. Apan iyang gipatin-aw nga dili tanang responsibilidad ang angay ipasangil sa usa lamang ka kompanya, kay nagkalain-lain nga kompanya ang nagpadagan sa landfill, ug dili lang ang Prime Integrated Waste Solution Inc.
Panawagan ni Valiente ngadto sa mga anaa sa renda sa pangagamhanan nga hatagan unta og tabang pinansyal ang mga nabiktima, ilabi na ang mga empleyado nga nawad-an og trabaho tungod sa trahedya.
Samtang sa pikas bahin, misaka na ngadto sa 20 ka tawo ang kumpirmadong namatay sa pagkahugno sa Binaliw landfill, ug nagpadayon pa gihapon ang mga operasyon sa pagkuha sa mga gikatahong missing, usa ka semana human nahugno ang dumpsite.
Matod sa mga awtoridad, ang pinakabag-o nga mga namatay nakuha gikan sa mas lalom nga mga bahin sa landfill samtang padayon ang trabaho sa mga retrieval team sa pagkuha sa mga lawas taliwala sa mga nahugno nga basura ug debris.
