Nagpasalamat ang Philippine Coast Guard sa China Coast Guard sa ilang operasyon sa pagluwas sa mga Pilipinong tripulante sa MV Devon Bay human kini nalunod.
Gipasalamatan sa tigpamaba sa PCG sa West Philippine Sea nga si Commodore Jay Tarriela ang China Coast Guard sa ilang operasyon sa pagpangita ug pagluwas sa pagtabang sa mga Pilipinong marinero nga nameligro sa dagat.
Nigawas ang pahayag human mitubag ang China Coast Guard sa pagkalunod sa MV Devon Bay ug giluwas ang mga Pilipinong tripulante niini.
Sumala ni Tarriela, kini ang hustong papel sa usa ka coast guard—ang pagluwas sa mga kinabuhi sa dagat—imbes nga mohimo og mga aksyon nga makapahadlok, makahasol, o makababag sa mga barko sa Pilipinas. Busa, iyang gipasiugda nga ang susama nga mga insidente dili angay moresulta sa pagkawala sa panginabuhian sa mga Pilipinong mangingisda sulod sa Exclusive Economic Zone sa nasud.
Samtang, emosyonal usab ang mga tripulante human sila giluwas sa CCG human sa pagkalunod sa ilang cargo vessel duol sa Scarborough Shoal.
Basi sa report, ang cargo vessel mibiya sa Gutalac, Zamboanga del Sur ug naglawig paingon sa YangJiang, China sa dihang nahitabo ang insidente.
Diin ang barko nagdala og 21 ka mga tripulante nga Pilipino, sumala sa usa ka post sa China Military Bugle, 17 ka mga tripulante nga Pilipino ang nabawi na, 15 niini ang anaa sa lig-on nga kondisyon ug 2 ang kumpirmadong patay samtang 4 ka mga tripulante ang wala pa mailhi.
