Mogikan na ang pipila ka federal immigration agents sa Minneapolis, sumala sa mayor sa maong siyudad, dungan sa mas kalmado nga tono ni US President Donald Trump human sa tibuok nasod nga kasuko tungod sa pagpatay sa duha ka lungsuranon sa Amerika.
Gipahibawo ni Minneapolis Mayor Jacob Frey pinaagi sa social media platform nga X nga magsugod na ang pagbiya sa “pipila ka federal agents,” apan wala kini mohatag og detalye kon pila ang gidaghanon niini. Gipasalig ni Frey nga padayon siyang maningkamot aron hingpit nga mapahawa ang tanang nalambigit sa maong operasyon gikan sa ilang dapit.
Matud pa ni Frey, nagkaestorya sila ni Trump niadtong Lunes diin miuyon ang presidente nga dili na mahimong ipadayon ang kasamtangang sitwasyon. Nagkaguliyang karon ang White House human nag-viral ang video sa labing bag-ong pagpamusil nga niresulta sa mga protesta ug pagsaway gikan nila ni kanhi presidente Bill Clinton ug Barack Obama, lakip na sa pipila ka miyembro sa partido ni Trump.
Sa usa ka talagsaon nga pag-usab sa tono, gihulagway ni Trump nga “very good” ang iyang pakighinabi kang Minnesota Governor Tim Walz. Samtang gipahayag usab ni White House Press Secretary Karoline Leavitt nga walay bisan kinsa sa administrasyon ang gusto nga naay masakitan o mamatay, dungan sa pagpadayag og kaguol sa kamatayon ni Alex Pretti, usa ka nurse nga gipusil sa mga immigration officer samtang nagprotesta.
