CEBU CITY- Gipahibalo sa Police Regional Office 7 (PRO-7) nga malinawon ug walay insidente ang usa ka semana nga dakong kalihokan sa ASEAN Tourism Forum ug Foreign Ministers’ Meeting nga gipahigayon sa Probinsya sa Bohol ug sa Siyudad sa Sugbo.
Sa pakighinabi sa Bombo News Team, miingon si PLTCOL Jose Los Baños, tigpamaba sa Cebu City Police Office (CCPO), nga walay natala nga kadaot o bisan unsang insidente nga nakabalda sa maong kalihokan, ilabina atol sa pagsuroy-suroy sa pipila ka mga deligado.
Kini bisan pa man nga adunay gipahigayon nga “unity ride” ang mga Diehard Duterte Supporters (DDS) sa Cebu City niadtong Huwebes, Enero 29, 2026.
Sumala sa kapulisan, nagpabilin silang komitado sa pagpanalipod sa mga demokratikong kagawasan, samtang ilang gibalanse ang kolektibong responsibilidad sa pagpanalipod sa interes sa nasud ug sa pagpalambo sa positibong imahe sa Pilipinas sa tibuok kalibutan.
Tungod niini, gipasalamatan pag-ayo sa kapulisan ang katawhan sa ilang kooperasyon, nga dako kaayong tabang sa pagsiguro sa usa ka luwas, hapsay, ug malampusong ASEAN Tourism Forum 2026.
Samtang, gikabutyag usab ni Los Baños nga iyang gi-awhag ang tanan nga magpabiling mosunod sa mga lagda nga gipahamtang sa mga otoridad, aron malikayan ang pagbilin og dili maayong impresyon sa mga deligadong mibisita sa Siyudad sa Sugbo.
