Gihangop ni kanhi Supreme Court Senior Associate Justice Antonio Carpio ang hagit ni Sen. Rodante Marcoleta alang sa usa ka public debate bahin sa West Philippine Sea.
Ang hilisgutan sa panaglalis mao kung legal ba ang West Philippine Sea ug kung apil ba niini ang mga bahin sa kadagatan sa Kalayaan Island Group.
Nagsugod ang kontrobersiya human giingon ni Marcoleta nga ang Pilipinas mahimong “isurrender” sa pipila ka bahin sa KIG tungod kay giingong wala kini masakop sa Exclusive Economic Zone sa nasud.
Hugot kining gisupak sa tigpamaba sa Philippine Coast Guard nga si Commodore Jay Tarriela, kinsa midapit pa gani kang Marcoleta nga moapil sa usa ka Maritime Domain Awareness flight aron makita ang tinuod nga sitwasyon.
Gawas kang Carpio, gihisgutan ni Marcoleta nga gusto usab niya nga makigdebate kang Tarriela ug Prof. Jay Batongbacal sa UP Institute for Maritime Affairs and Law of the Sea.
Si Carpio usa ka iladong tigpanalipod sa katungod sa Pilipinas sa WPS, labi na human sa 2016 arbitral ruling nga nag-invalidate sa nine-dash line claim sa China.
Naglaum ang ubang mga tigpaniid nga ang debate makapatin-aw sa publiko sa legal nga basehan sa WPS ug sa kamahinungdanon sa pagmintinar sa soberanya sa Pilipinas sa mga gikuwestiyon nga teritoryo.
