Gibutyag sa National Bureau of Investigation – Central Visayas (NBI-7) nga sagad sa mga report nga maabot sa ilang buhatan sa dibisyon sa cybercrime kay mga “love scams” karong buwan sa Pebrero ug sa pagsingabot sa Adlaw sa mga Kasing-kasing (Valentine’s Day).
Kini ang gikabutyag ni Maria Contessa Lastimoso, ang tigpamaba sa NBI-7 atol sa pakighinabi niini sa mga sakop sa tigbalita nga matod pa dali mailad ang pipila ka indibidwal tungod sa social pressure nga adunay maka-pares sa adlaw sa Pebrero 14.
Dugang niini nga ang love scam o romance scam kay sagad sa ilang modus operandi kay magbuhat og peke nga mga online social media accounts sama sa pagkuha og pangalan sa mga artista o mga langyaw nga mga sundalo dayon makisuod sa biktima hangtod sa maabot sa punto nga aduna nay salig kini sa scammer kay magbuhat dayon og kunuhay panghitabo nga manginahanglan og kwarta aron sila magkita o regalo ang ipadala.
Gani gitawag kini sa mga awtoridad nga “Pig Butchering Scams” kay susama sa magbuhi og baboy nga lawgan hangtod sa lapaon, ang biktima sa scam kay kanunay bubuan og daw “language of love” via online hangtod sa musalig na kini og makuha na ang mga gipangayo nga balor sa kwarta.
Pahimangno sa NBI-7 sa publiko ilabi na sa mga uhaw sa gugma nga dili dayon musalig sa mga tawo nga naila-ila ra online kay dakong porsyento nga modus sa scam na kini og panghimuslan lang ang imong kamingaw sa adlaw sa kasing-kasing.
