Giawhag ni Cebu Gov. Pamela Baricuatro ang mga batan-ong atleta nga hatagan og mas dakong bili ang maayong pamatasan kaysa sa pagdaog lamang samtang pormal nga giablihan ang Cebu Provincial Sports and Cultural Meet 2026 niadtong Dominggo didto sa Carcar City Sports Center.
Gipahinumdoman sa gobernador ang mga partisipante, coach, ug mga ginikanan nga ang tinuod nga kalampusan masukod pinaagi sa pagpaningkamot ug pagtinabangay, diin ang mga leksyon sa kalig-on sa kasingkasing maoy labing mahinungdanon nga madala sa matag usa sa ilang pagpauli.
Gisiguro usab sa kagamhanan sa probinsya ang padayon nga suporta sa mga programa sa paugnat sa kusog aron mapalambo pa ang talento sa kabatan-onan nga giisip nga kusog sa Sugbo. Kauban sa gobernador sa maong kalihokan sila si Mayor Patrick Barcenas sa Carcar, Schools Division Superintendent Dr. Senen Priscillo Paulin, Vice Governor Glenn Anthony Soco, ug uban pang mga opisyal sa lalawigan. Ang maong torneyo sugdan sa Pebrero 15 hangtod 20 ug pagahubaton sa nagkadaiyang dapit sama sa City of Naga, Carcar, Minglanilla, San Fernando, Sibonga, ug Argao.
Gipasundayag usab sa maong sports and cultural meet ang mga kabilin sa Sugbo pinaagi sa mga indigay sa balak, balitaw, folk dance, ug uban pa nga sinalmutan sa 44 ka mga lungsod.
Ang mga modaug sa maong kompetisyon maoy morepresentar sa Probinsya sa Sugbo alang sa umaabot nga Central Visayas Regional Athletic Association (CVRAA) Meet nga pagahisayunon sa City of Naga karong Marso 22 hangtod 28.
Samtang ang tibuok kalihokan ubos sa tema nga nagpunting sa pag-umol sa karakter ug kalig-on sa mga Sugboanong atleta.
