Giklaro sa aktres nga si Kylie Padilla ang usa ka viral video diin siya nagkomedya bahin sa posibilidad nga ang iyang amahan, si Robin Padilla, modagan pagka-Bise Presidente sa 2028.
Sumala niya, wala niya tuyoa nga insultuhon ang iyang amahan.
Pagpasabot ni Kylie sa iyang x account nga mobiya lang siya sa Pilipinas kay gusto kini og hilom nga kinabuhi. Dili kini komento nga gituyo aron insultuhon ang iyang amahan, ingon man nga masaligon kini sa tanang hukom nga buhaton ni Sen. Padilla diin nakatutok kini sa kaayuhan sa katawhan ug nasud.
Gihimo niya ang pagklaro human makadawat og mga pagsaway gikan sa pipila ka mga netizens nga naghubad sa iyang komedya nga pagbiaybiay sa iyang amahan.
Ang komedya naggikan sa usa ka interbyu diin gipangutana siya kung unsa ang iyang reaksyon kung ang iyang amahan modagan sa eleksyon.
Sumala ni Kylie, aduna usab siyay katungod sa pagpili og hilom ug malinawon nga kinabuhi.
Kini human sa pamahayag ni Robin Padilla niadtong Pebrero 20 nga bukas siya sa posibilidad nga modagan pagka-Bise Presidente ug mahimong running mate ni Bise Presidente Sara Duterte, kon hangyoon siya ni kanhi Presidente Rodrigo Duterte.
