LILOAN, CEBU- Pangunahan ni DSWD Secretary Rex Gatchalian ang inagurasyon ug opisyal nga pagbukas sa ‘Pag-Abot Program Processing Center’ sa Barangay Tayud, Liloan, Cebu karong adlawa, Pebrero 26, 2026.
Ang maong pasilidad sa DSWD-Central Visayas gipailalom sa usa ka solemn nga blessing nga gipangunahan ni Padre Ryan Jay Aban sa Mission Society of the Philippines.
Sa iyang mensahe, gipasiugda ni Gatchalian nga ang PPC mao ang ikatulong pasilidad sa Central Visayas nga gitukod sa departamento aron maghatag og komprehensibong serbisyo sa social protection ug mga interbensyon alang sa mga bata, indibidwal, ug pamilya nga anaa sa kadalanan.
Matud pa niya, ang sentro magsilbing temporaryong kapuy-an sa mga benepisyaryo samtang ipaagi sila sa assessment ug profiling aron mahibaw-an ang tukmang tabang nga ilang gikinahanglan, isip kabahin sa ilang reintegration ug pagbalik sa normal nga kinabuhi.
Kompleto ang pasilidad sa mga klinika, mga kwarto nga adunay kaugalingong kasilyas ug banyo, regular nga mga kwarto, communal comfort room nga adunay lima ka kasilyas ug upat ka shower, administrative office, activity area, prayer room, kusina ug kan-anan, conference room, profiling area, baggage counter, stockroom, ug laundry area nga adunay clothesline.
Adunay kapasidad ang PPC sa pag-atiman og kapin sa 120 ka indibidwal, diin ang matag benepisyaryo gilauman nga magpabilin sulod sa mga usa ka bulan samtang ginaproseso ang ilang pagbalik sa komunidad aron malikayan ang pagbalik sa pagpuyo sa kadalanan.
