Miulbo ang usa ka sunog sa kabalayan diha sa Sitio Tambis, Banawa, Barangay Guadalupe, dakbayan sa Sugbo, niadtong Lunes sa hapon, Marso 2, nga maoy unang narekord nga sunog sa dakbayan alang sa Fire Prevention Month karong tuiga.
Matod sa Bureau of Fire Protection (BFP) Cebu City, ang sunog napaabot sa ilang buhatan sa alas-3:15 sa hapon, hinungdan sa dinaliang pagtubag sa Cebu City Fire Station.
Ang kalayo nilamoy sa usa ka residential area ug nakaapekto sa pipila ka mga istruktura. Giisa ang alarma ngadto sa first alarm sa alas-3:21 sa hapon ug misaka sa second alarm upat ka minuto ang milabay, sa alas-3:25 sa hapon, samtang ang kalayo mikatap sa mga silingang balay.
Sa gihimong pakighinabi sa Bombo Radyo Cebu newsteam kang Noel Navaja, ang konsehal sa Barangay Guadalupe, iyang gikabutyag nga adunay dili mominus 20 ka panimalay ang apektado sa maong sunog, nga gilangkoban sa 44 ka pamilyahan.
Dugang ni Navaja, ang barangay karon nidalit og ginagmay nga hinabang sa mga apektadong indibidwal, samtang wala pa moabot niadtong tungura ang hinabang gikan sa DSWD.
Gideklarar sa mga bombero nga kontrolado na ang sitwasyon sa alas-3:51 sa hapon, ug hingpit nga napalong ang sunog sa alas-4:03 sa hapon. Nikabat sa 12 ka trak sa bombero ang nitubag sa dapit, inubanan sa duha ka ambulansya ug 10 ka auxiliary personnel.
Sa pasiunang datos gikan sa BFP, migula nga siyam ka balay ang naugdaw, diin gibana-bana nga moabot sa 900 square meters ang dapit nga nasunogan. Ang danyos sa kabtangan gibana-bana nga moabot sa 1,350,000.
Nagtanyag ang mga opisyal sa barangay og evacuation center sa Guadalajara alang sa mga apektadong residente. Apan, pipila ka pamilya ang mibalibad sa pagbalhin kay mas gipalabi nila nga magpabilin duol sa ilang mga kabtangan.
Ang Department of Social Welfare and Services (DSWS) Cebu City nagsugod na usab sa pagkuha ug paghipos sa datos sa mga apektadong pamilya para sa dugang nga hinabang.
Nahitabo kini sa pagsugod sa Fire Prevention Month nga gisaulog matag Marso, usa ka panahon nga kasagarang malambigit sa pagsaka sa mga insidente sa sunog tungod sa nagkainit nga panahon.
