CEBU CITY- Naglunsad og imbestigasyon ang Cebu City Police Office (CCPO) human sa reklamo nga usa ka miyembro sa Traffic Enforcement Unit (TEU) ang giingong migamit og motorsiklo nga na-impound tungod sa paggamit og aftermarket mufflers.
Matud ni Police Col. George Ylanan, officer-in-charge sa CCPO, nga kasamtangang giberipika sa mga awtoridad ang tanang sirkumstansya nga naglibot sa maong alegasyon.
Gipasiugda usab niini nga ang opisyal nga pahayag sa kapulisan ibase lamang sa mga kamatuorang mapamatud-an sa imbestigasyon.
Mitumaw ang isyu human mi-kwestyon ang tag-iya sa maong motorsiklo pinaagi sa usa ka social media post.
Sa hulagway nga gipatik, makita nga gimaneho sa usa ka sakop sa pulis ang motorsiklo sa kadalanan bisan og kini na-impound atol sa One Time Big Time operation batok sa modified ug aftermarket mufflers.
Sa maong post, gipadayag sa tag-iya sa motorsiklo ang iyang pagsaway sa kapulisan sa Dakbayan sa Sugbo tungod sa alegasyon sa pagpang-abuso sa gahum.
Tungod niini, mihangyo si Ylanan sa tag-iya sa motorsiklo nga moduso og pormal nga reklamo aron mahatagan kini og hustong aksyon ug masuta ang tinuod nga nahitabo.
Base sa impormasyon gikan sa CCPO, walo ka mga motorsiklo ang na-impound tungod sa paglapas sa balaod batok sa paggamit og modified ug aftermarket mufflers atol sa operasyon niadtong Pebrero 28.
Ang mga na-impound nga motorsiklo gidala gikan sa CCPO Headquarters padulong sa impounding area sa Land Transportation Office-7 (LTO-7) alang sa hustong disposisyon.
