CENTRAL VISAYAS- Nagpatuman og saka presyo sa ilang pletehan sa mga byahe sa ilang mga routa ang mga kumpanya sa barko diri sa Sugbo ug Visayas mugna sa kamahal sa presyo sa krudo tungod sa kagubot nga mitumaw sa Middle East.
Nakapa-aghat kini sa kasamtangang upat ka mga kumpanya sa barko sa rehiyon sa maong bag-ong polisiya sa umento sa pletehan tungod na sa nagkataas nga galastuhon sa ilang operasyon.
Ang Starlite Ferries nga adunay mga routa sa Sugbo ug Bohol kay magpatuman og 25% nga saka sa ilang pletehang para sa pangpasaheroan ug cargo sugod inig Martes, Marso 10 base sa ilang pagpahibalo sa anunsyo niini sa ilahang social media account.
Ang Roble Shipping Lines sab nga adunay giserbisyohang routa sa Sugbo ug Leyte kay magpatuman og temporary fuel surcharge sa ilang passenger ug freight services sugod karong adlaw sa Lunes, Marso 9.
Samtang ang FastCat kay hagbay nang nag-update sa ilang pletehan niadto pang Marso 6 aron mulahutay sa ilang operational expenses.
Ingon man ang SeaCat sa GRAND Ferries kay nag fare adjustments na sab niadtong Dominggo, Marso 8.
sa laing bahin, ang fastcraft operator nga OceanJet kay nag-suspenso usa sa pipila ka mga giserbisyohang routa tungod gihapon sa kamahal sa krudo nga naka-apektar sa ilang operasyon.
Kahinumduman nga niadtong Pebrero 28 kay milusad og pagpangataki ang hinuusang pwersa sa Estados Unidos ug Israel batok sa nasud nga Iran diin nakamugna og instability sa rehiyon nga nagpa-aghat og kalisod sa pagtabok sa Strait of Hormuz nga usa sa mga agianang pandagat sa mga dagkong oil tanker ships nga nagdeliver og petrolyo sa mga kanasuran sa Asya ug ubang bahin sa kalibutan nga nagpahinabo og kamahal sa presyo sa krudo.
